葉劉早幾日自資喺報紙登廣告，點名呼籲林鄭「不要搶走窮人唯一的小羔羊」，炮轟降低強拍門檻削弱小業主議價能力，質疑政府咁做只係方便發展商收樓。葉劉來勢洶洶，林鄭都不甘示弱，噚日透過報章專訪同港台節目千禧年代大反擊。
林鄭開咪劈頭就話，唔同意議員話佢「答應咗發展商先要做嘢」，又話咁嘅猜測唔可以接受，「尤其係嚟自一個我以前非常之尊敬嘅同僚。我覺得，呢樣嘢大家要小心睇！」主持人追問林鄭對葉劉出招有冇覺得驚訝？林鄭咁好打，當然食自上，自爆當年跟過葉劉，覺得舊上司做咗議員為民請命，係無可厚非喎。
講到為民請命，林鄭一啲都唔輸蝕，話作為局長，都係為緊八成小業主請命。言下之意，係想用多數壓倒少數，叫葉劉收聲。葉劉登得廣告，就預咗企硬玩鋪勁，佢噚晚同八方講時，仍然堅持一旦降低強拍門檻，就會即時削弱小業主議價能力，又話如果家唔係有九成門檻頂住，好多小業主根本唔會收到發展商相對優厚嘅出價，話呢個係簡單嘅經濟常識。葉劉又話，預咗立法會內投票形勢唔樂觀，希望就算過咗政府可以暫緩執行一年，等直選議員好向選民交代。查實林鄭喺電台節目都有提到，如果立法會決定遲一年執行，相信政府可接受。預晒位畀大家走盞。