韓國近日雖然爆出「新沙士」恐慌，但韓片《Twenty》男星姜河那今日就按照原定行程，聯同電影導演李炳憲現身香港，並到九展E-Max為電影進行宣傳，仲吸引成300粉絲到場圍觀，當中仲有唔少係支持高大靚仔嘅導演0添。

雖然戲院咁多人，但現場粉絲就似乎唔擔心新沙士，現場戴口罩嘅人真係唔多，就連姜河那同行嘅工作人員都有戴口罩，可能大家都唔怕新士啦，現場亦唔見大會有咩衞生措施安排。

事隔一年再次嚟港宣傳，姜河那就表現得好興奮，全程傻笑，而第一次嚟港嘅導演對於可以來港會見粉絲都很開心，當擁有演員般帥氣面貌嘅導演被問到有冇考慮下次躋身演員行列，自編自導自演作品時，姜河那聽到問題都即刻儍笑，李導演就搞笑話：「我以為只有我阿媽覺得我靚仔，我本身冇演技天份，所以都係留係攝影機後面做指導好了。」

問到姜河那係戲中角色係怕醜仔一名，但又會向暗戀對象勇敢表白，現實中佢又係咪咁時，姜河那話：「我都有暗戀過人，而且我有鍾意嘅人時我唔會收收埋埋，會大方表白。」姜河那仲自爆自己同戲中角色最唔同嘅係，現實中佢並唔係一個讀書叻嘅人。

活動上，姜河那就同幾個幸運粉絲係台上重演戲中部份情節，當中姜河那就要示範飲醉酒嘅演技，佢仲詐儍扮醉攬攬粉絲，令台下粉絲勁羨慕。姜河那喺活動結束時，就被現場突然爆出嘅紙碎效果嚇親，非常搞笑。

事後接受訪問時，姜河那就提到今次雖然同戲拍檔金宇彬、李俊昊未能同行，但能跟導演同行亦很開心，又話已計劃返回韓國後會相約兩位拍檔同導演見面。問到導演有否考慮拍續集，並命續集為《30》時，導演話：「喺片場有跟演員們討論過，還是等姜河那30歲才算。」至於續集會唔會加重姜河那戲份時，導演就搖晒頭話唔會，因為姜河那嘅戲份已經夠多。