現年32歲嘅韓國女星車藝蓮，因拍攝劇集《華麗的誘惑》與39歲朱相昱撻着，兩人今年5月拉埋天窗後，車藝蓮於本月初宣佈懷孕消息，不過就冇透露懷孕幾多個月及BB性別。

車藝蓮雖然已經調整並減少工作，不過仍然未停工安胎，車藝蓮上周更新Instagram表示正為護膚品牌拍攝新相，相中可見佢露出香肩及玉背，對於老婆咁性感嘅衣着，唔知朱相昱有冇嬲豬？

而車藝蓮宣佈陀B後今日首度公開露面，現身品牌嘅簽名活動。身穿粉紅色大褸嘅車藝蓮，好似唔怕凍咁着住短裙晒腿亮相，仲要着埋埋高踭鞋，認真牙煙！同時，亦因為大褸遮住咗，睇唔清車藝蓮見肚未，但車藝蓮塊面就明顯比以前圓潤咗啲。

更多韓流，喺晒《娛果》
http://fb.com/appledailyent