人生係無常，每個人都必須經歷生離死別！今日凌晨無綫重播林燕妮特備節目《懷念林燕妮 向世界出發》，悼念一代才女。

林燕妮係家中長女，面對弟妹林振強、林振剛與林雁妮皆患淋巴癌離世，尤其著名填詞人林振強於2003年離開，林燕妮拍《向世界出發》時，佢講自細出生在幸福家庭，環境富裕，「冇咩嘢係我想要而係得唔到」，爸爸係商人，媽媽係家庭主婦，過住無憂無慮嘅生活，佢哋四姊弟妹、爸爸媽媽，仲有幾個傭人，住三層樓嘅獨立屋，出面有一個花園，又有車房。

林燕妮最錫就係大細佬林振強同細妹雁妮：「我哋四姊弟妹感情好好，我同大細佬感情最好，因為跟得密，我哋喺屋企排第一、第二，我又好錫妹妹，因為得一個妹，細細佬後生時好乖，成年後奀皮。」

面對弟妹及爸爸先後離世，林燕妮飽受生離死別之苦，「我家人咁短命，一個二個咁走，我係冇得控制，惟有喺佢病嗰陣盡量對佢哋好。」直至弟弟林振強走，令林燕妮感受最痛：「有一日，我喺屋企書房，聽話響起，我聽到細佬把聲，當時佢講『家姐救我一命』，我當時問咩事，佢話有淋巴癌，要捐骨髓，我即話好，我冇太大反應，當時佢都好平靜，驗咗我同細細佬都可以捐，再驗發現原來細細佬都有cancer，撞正2003年沙士，真係好麻煩，佢住隔離病房，我哋靠email通訊，我哋多數係閒聊，做完電療要戴口罩，一電療佢就嘔，同我講『要戴住個口罩嘔，你話幾好笑呢』，佢仲係同我講笑，佢又影咗張相俾我，話『你抽出嚟嗰啲幹細胞就係咁，原來橙橙哋色好似蘿蔔汁咁，真係好喇，我啲血裡面有你啲血』，我哋好樂觀，一直聯繫到大細佬走為止。」

2003年，林振強同胞弟林振剛在六星期內，先後因淋巴癌逝世，林燕妮傷心說：「細細佬見哥哥都搞成咁走，細細佬走嗰陣，我都好平靜，媽咪打嚟同我講『小弟噚晚走咗』，當屋企兩個細佬咁頻密，走完一個都未傷心完，就到第二個，你再震撼一次，當時我非常孤單，我係單身媽媽，我個仔細、媽咪年紀大，我係企喺中間位嗰個，我單獨面對世界，禪修可以令我面對世界同突然變化，我哋要超越死亡，接受死亡。」

「如果我冇禪修過咁多次，我可能接受唔到，好似振強咁，佢留低一啲歌、留低一啲『洋蔥頭』，留下好多好好笑嘅散文，佢不枉此死，我想同雲上雲上雲上細佬妹講『唔使掛住我，唔使擔心，你哋繼續快樂，我搞得掂，我好有勇氣』。

相關新聞連結：
翻loop《笛子姑娘》燕妮振強痛失胞妹 網民嘆「終於團聚」
https://bit.ly/2Hp291N