【利豐私有化】謾罵聲中通過 散戶持股10年蝕300萬 「無諗過馮氏咁卑鄙」
蘋果日報 2020/05/12 12:38
私有化私豐
利豐私有化今投票。- 滬港專業人士聯會會長趙麗娟。
【更新內容】利豐（494）晚上宣佈，私有化方案獲足夠股東票數同意通過，最後交易日為本周五（5月15日），並將於5月27日撤銷上市地位。利豐今日收報1.21元，較私有化價格1.25元有輕微折讓。
在一片散戶謾罵聲中，利豐主席馮國綸稱：「我很高興股東贊成通過利豐的私有化建議。我衷心感謝股東在過往接近30年的環球零售行業變化中對我們的長期支持。」利豐指，因數碼化和中美貿易戰對零售行業的持續影響，加上疫情對全球供應鏈構成阻礙，「創造未來供應鏈的目標」比以往更加重要。
散戶：食飯都唔係咁安樂 或重回職場
利豐特別股東大會今日中午舉行。會前小股東陳生指，自己自2010起多次購入該股，打算保值收息作退休用，現時持約20萬股，平均價逾20元，多年都無售出，現價計虧損逾300萬。
陳生稱，看過《蘋果》才知道私有化消息，「股價跌，大家你情我願，但無理由喺最低位嗰時候（私有化）。」他指美國經濟見復蘇迹象，在股價有曙光前提私有化，「出依個絕招」，是極不公平。
「一直跌我都接受，但無諗過咁卑鄙！」他坦言公司多年業績不太好，但認為能起死回生。已退休的陳生稱，因股價下跌「食飯都唔係咁安樂」，但坦言自己已算「睇得開」，「如果唔係自殺都可能」，更指因此可能要重回職場。
陳生最後寄語管理層：「君子愛財，取之有道，如果唔係咁正派得到嘅錢，就唔係咁好。」
不滿沒有投票權 直斥馮國綸「希望你厚德載物」
有小股東在會上指，不解未能參與與私有化有關的會議和未享有投票權，直斥「希望你（集團主席馮國綸）能夠厚德載物」。陳小姐在會上表示，外面職員稱其沒有權參與法院會議和特別股東大會，但她認為餘下會議才是今日「重頭戲」，「好多（私有化）文件講得唔清楚，好多小股東都想同有權益了解清楚計劃嘅細則」，並前後多次以「主席馮國綸博士」稱呼馮國綸。
雖然馮歡迎其參與餘下會議，但能否投票等法律問題需交由同事處理。陳小姐強調「我係第一次參加，平時從來唔出席，但我知道後面有兩個非常重要嘅會議，如果我喺呢兩個會議喪失投票權，係咪要燃眉之急解決投票權問題呢 ？」最後還以「多謝馮國綸博士，希望你能夠厚德載物！」作回應。
有同樣問題的小股東馮女士氣憤指「我唔係冒充」，認為利豐剝奪小股東權利，「非常遺憾，係好那渣嘅做法！點解我係股東，但唔可以出席core meeting ？」並指投票以人頭計算，現時做法會令人誤解為不讓小股東投票。
被問及利豐如何釋放股東價值，馮坦言目前外地經濟環境惡劣，公司近年積極重組公司，希望將股東價值釋放，但小股東顯然不滿，回應指「好感恩你一直有小股東喺心，你係一個博士先生，你咁講我無話可說，單單一間利豐物流就價值百幾億，遠遠cover咗私有化（費用），點釋放畀股東？」話畢在場人士紛紛鼓掌。
席間有小股東因Wi-Fi問題表達不滿，「我問咗十幾個人Wi-Fi都唔比，得一個人畀我，冇理由封閉咗Wi-Fi！」同場其他小股東均起哄，有人大叫「點解唔畀人上網？即刻開放上網 ！」其後有職員將Wi-Fi密碼列印，貼在會場的當眼位置上。
不乏散戶支持私有化
前利豐員工，滬港專業人士聯會會長趙麗娟表示支持私有化，她指相信管理層經多次研究才做出決定，雖然持股仍有虧損，但認為經濟有起有跌，投資有虧損在所難免。
問到在經濟見曙光前提私有化，會否對小股東不公平，她指多年來管理層一直為員工及股東着想，「要作出（私有化）決定都痛㗎」，指決定為公司最佳方向。趙亦指出，在公司工作多年，試過有美國客戶破產，馮氏都極力支持供應商，「真係體驗到佢係良心僱主」。提到利豐中介人角色已褪色，趙為前公司澄清，利豐早在70年代已轉型，「當年馮生兩兄弟返嚟就係做依樣嘢」，將業務轉變為供應鏈管理，「如果咁簡單就唔會去到今時今日」。並指利豐現時面對的問題，在很多企業都有出現。
資料顯示，她為前利豐發展(中國)董事。
私有化亦不乏散戶支持，楊生在股東會途中離場，稱：「仇就無得報，大家要接受」，指會內氣氛很好，認為私有化作價「低都無辦法，好過幾毫子」。
楊生不願公開購入價，僅表示「都捱咗好多年，時間已蝕咗」，現時只想拿回現金。