張家輝再次自導自演嘅《陀地驅魔人》，只係上映咗一個禮拜多啲，但截至前日嘅累積票房已經去到約1,057萬，成績理想！

家輝拍咗短條片答謝戲迷支持，佢話：「多謝大家支持《陀地驅魔人》，票房已經過千萬喇，好開心，多謝大家支持！未睇嘅，快啲入場睇，你以為睇緊陀地咩？原來又唔係睇陀地。以為睇緊驅魔人咩？原來又唔係驅魔人嚟。以為睇緊陀地驅魔人咩？咁其實又係愛情片嚟。當你以為係愛情片，其實又會覺得都幾好笑丫。所以未睇就入場支持啦，睇咗嘅觀眾就睇多兩次，多謝晒！」

家輝咁講，咪即係一個價錢睇晒鬼片、笑片同愛情片？