公民黨黨魁楊岳橋(AY)喺立法會選舉時，爆出「娥頸橋之戀」，被惡搞照片，將佢同CY頭號粉絲陳玉娥變成一對，但其實佢一直心有所屬，今日仲喺facebook上載疑似一家四口家庭照，場面好溫馨。唔少人留言話呢對愛侶好襯，仲祝佢哋「百年好合，永結同心」，有人亦戥娥姐不值：「岳少…娥姐點算先…」

睇真啲，女嘅竟然係新民黨容海恩，乜AY移情別戀，背住娥姐搭上容EE？查實大家又唔使咁多心，呢鋪岳少唔係花心，只係對聽障人士狀況好上心，早前同容EE一齊去體驗聽障家庭嘅難處，今晚6點嘅《鏗鏘集》會播出節目，所以佢咪提早宣傳。

AY話公民黨一直積極推動手語成為官方語言，希望聽障人士可以真正融入社區。而名草有主嘅AY，查實去年已向女友求婚，好快就拉埋天窗，一家四口樂融融嘅溫馨場面，話唔定終有一日喺現實上演！