歷史上首次踢意甲的升班馬賓尼雲圖，開季至今五戰全敗，對上兩場對住勁旅羅馬同拿玻里更被大炒，睇嚟來季降回意乙機會都好大。面對咁惡劣嘅情況，佢哋會長維哥列圖（Oreste Vigorito）當然灰，仲話嚟緊佢哋可唔可以成功護級，關鍵在一支藥膏身上。

原來，賓尼雲圖隊長盧斯奧尼喺第三輪對拖連奴場波後，做藥檢時呈陽性反應，嚟緊好大機會被停賽，但個原因係佢之前有傷口，接受醫生建議，搽咗隻藥膏喺傷口，點知隻藥膏原來含有被禁用嘅合成代謝類固醇，就係因為咁而過唔到藥檢。

話就話係藥膏，維哥列圖怪嘅當然係個醫生，仲話嗰隻藥膏根本只係啲怪味嘅cream，都唔知點可以攞嚟做藥膏。佢話如果盧斯奧尼被罰長時間停賽，呢隊波就好難可以喺意甲生存到。