一星期前喺首屆「金茶王大賽」奪得個人組「奶茶之王」嘅酷男陳偉聰，果然冲出彩虹，打散工嘅佢獲封奶茶王後引起唔少老細興趣，原來向華強已暗中出手，雙方一拍即合。奶茶王上星期四已到向生旗下澳門蘭桂坊酒店返工，向生仲佈置咗個「金牌奶茶王」專櫃畀佢打骰㖭！

月薪逾兩萬元

據講向生日日無奶茶不歡，上星期睇到奶茶王出爐消息即聯絡陳偉聰，向太陳明英同八方講，上星期三搵到陳偉聰，未試過佢杯茶已決定請佢，叫佢翌日買茶葉、冲茶架生即刻去澳門開工，月薪逾兩萬元，比做普通水吧高一大截，「佢自願返兩更，又話要養父母同個仔，所以畀高啲人工佢。」
向太話酒店嘅酒吧整咗個「金牌奶茶王」專櫃交畀陳偉聰負責，暫時免費供顧客品嚐，視乎反應稍後先定價。佢試過陳偉聰手勢，覺得並非浪得虛名，又坦言請奶茶王加盟有啲噱頭性質，「我都希望港式奶茶喺澳門發揚光大。」

睇好澳門發展

身價驟升嘅陳偉聰噚日載譽歸來，出席飲食業為台灣天災籌款活動，豪擲一萬蚊買咗一杯由行會召集人梁振英冲嘅奶茶。梁振英同香港咖啡紅茶協會會長黃家和一齊冲咗一壺共三杯奶茶，籌到三萬元，陳偉聰出手不同凡響，但叫大家咪誤會，佢只係代表老闆向生向太做善事。向家同台灣關係密切，台灣有難，當然義不容辭捐錢。
陳偉聰跟向生搵食，話覺得喺澳門發展會好啲，遲吓可能會搬去公司宿舍長駐澳門，佢話如果想嘆佢冲嘅奶荼，「日後就一定要去澳門喇。」至於梁振英冲嗰杯萬元賑災奶茶，奶茶王只係呷咗一細啖，不願評論水準，解釋自己素來唔鍾意飲奶茶，亦好少試其他人手勢，就算成萬蚊杯都係咁話，「我驚影響到自己嘅味覺，因為人有情緒，飲咗人哋杯茶，到自己冲茶時就會反覆考慮，會影響自己，所以試飲都係飲一啖啫。」以茶論人，梁振英杯奶茶有冇特首味呢？奶茶王好謙，「呢啲唔係我評論嘅。」
mailto:[email protected]