韓劇《經常請吃飯的漂亮姐姐》(漂亮姐姐)上位男星丁海寅，將於聽晚喺九展舉行粉絲見面會，今日下午佢率先抵港，晚上出席喺新蒲崗舉行嘅記者會造勢，吸引大批粉絲圍觀。

晚上8時，丁海寅以西裝造型現身，即以廣東話打招呼：「大家好，我係丁海寅。」表示今次係第一次嚟香港，覺得所有嘢都好新奇，感謝大家嘅熱情支持，又話：「今日企喺舞台上，係難忘嘅回憶。」對於聽日嘅騷，佢坦言心情既驚張又興奮。而見面會上，佢更會向大家展示佢真正嘅一面。

丁海寅表示，於《漂亮姐姐》中有幸跟孫藝珍前輩合作，係佢嘅光榮，而且係畢生難忘嘅作品。

之後丁海寅不停派心、甜笑及揮手，大攞甫士畀大家影相。然後4名幸運粉絲上台，重現丁海寅以往角色嘅造型，丁海寅亦識做地跟對方握手及抱抱。完場前，丁海寅行落台跟粉絲影大合照，引來粉絲不停尖叫。

於訪問環節中，丁海寅表示是次來港，首次想欣賞香港夜景同埋周圍行吓，又想食點心及雲吞麵。

提到因為《漂亮姐姐》大受歡迎，令佢可以嚟到香港見大家，佢都感到好怕醜同好開心。又透露於劇中嘅飲酒場面，佢都係真飲酒，所以戲中見到佢有臉紅紅。而下次，佢就想挑戰現代動作片，如果有機會，佢都希望可以跟梁朝偉合作。

更多韓流，喺晒《娛果》
http://fb.com/appledailyent