陳慧琳(Kelly)噚晚紅館騷尾場，騷後訪問時Kelly聲沙沙，問佢係咪唔舒服?佢話係:「都冇休息。」有冇時間唞?佢話:「冇呀，下星期要上電視跳返演唱會其中一part舞。」台上勁爆喊?佢話:「o依家少少嘢都可以觸動到我，我一向都係喊包。」

問咁多日唔見兩個仔有冇詐型?Kelly話:「冇，佢哋都有探班，之前2個仔上台唔肯走，今日好啲，我同佢哋講聽日就可以返屋企，呢9晚我都冇返屋企。」有咩補償?佢話:「扮SantaClaus(聖誕老人)。」

點解老公只喺台下影相唔上台?Kelly話:「佢怕醜嘛。」完騷有咩感受?佢話:「真係鬆晒，一氣呵成做晒9場，明年出碟，要宣傳先。」之後巡迴搞幾多個站?佢話:「未知，唔使做得咁辛苦嘅，唯一要求係放假，人哋放假嘅日子，佢哋(兩個仔)做功課我走唔開，之後去鍾珍個Newyearparty慶祝。」

講到助手Winnie跳舞好勁?Kelly話:「係，佢平時同我一齊排嘅，其實佢partpart都識跳，之前去台灣都有同我一齊跳。」咁幾時到囝囝跳?Kelly笑言:「可能要等我好老先得啦。」台上跳舞班日本小朋友都係10歲左右?Kelly話:「佢哋(兩個仔)唔係由細train到大。」有冇表演慾?佢話:「唔得o架，淨係坐喺度企喺度，要比佢哋試下個升降台，細仔有啲驚。」

細仔台上講BB話?Kelly搞笑嘆氣叭喺張檯話:「原本我想叫佢講HappyNewYear，但佢太high。」之後搞巡迴帶埋囝囝去?T佢話:「所以咪要放假先囉，先可以帶佢哋去，迫埋老公去，演唱會已經好多嘢要記，唔可以比個仔搞到分心。」