黃依汶（Emme）今日喺金鐘出席自家主理嘅品牌「Galtiscopio迦堤」新專櫃開幕禮，好姊妹何嘉莉（Lilian）現身撐場。Lilian今年9月先生完B女（新聞連結： http://bit.ly/2A5GARp ），一坐完月就出山撐好友，認真唔話得！見Lilian好似冇乜點肥，只係有少少雙下巴，佢話：「係為佢而出㗎，因為o依家仲補緊，諗住收工嘛，未回復到最好狀態，仲有雙下巴。」Emme即笑言送兩個瘦面療程畀好姊妹。

Lilian話冇餵人奶，目前主要補身調理身體，問到點解咁快封肚？Lilian就話：「夠嘞，兩個仲唔夠？唔易handle。」Lilian透露5歲嘅囝囝Jean不但冇呷醋，仲好期待見妹妹，每日返學前都要抱吓妹妹，Lilian仲話o依家好幸福，雖然又做媽媽係辛苦嘅開始，又要顧大又要顧細，最緊要取得平衡。

而Emme就大讚Lilian事業同家庭都兼顧得好好，仲話佢哋嘅經歷好相似，Emme亦都贊成生兩個就夠，問佢係咪努力中？Emme就話：「老公就努力緊，我冇努力過，因為我要做嘢，已經冇時間畀陳真，等佢返咗學先，4、5歲再研究。」Emme話囝囝1歲8個月大，生得牛精同成熟，出街啲人以為佢3歲，Emme話：「o依家好開心多個女（Lilian女兒），陳真就多個妹咁，大家年齡好接近。」記者笑問會唔會考慮對親家？Emme即大讚陳真好靚仔，Lilian就笑話囡囡好肥好生養，話要認真對一對。另外，Emme講到由原名伊汶改成依汶嘅原因，原來係因為算命批呢個會令佢溫柔啲，可以平衡家庭同事業。

更多娛聞，喺晒《娛果》
http://fb.com/appledailyent