眾所周知行政長官曾蔭權愛在家中飼養錦鯉，高峯期曾飼養超過三十條。到底一條錦鯉的身價值多少？水族廣場主席李雅倫表示，要視乎錦鯉的產地、品種及色澤而定，「一條靚嘅錦鯉，分分鐘可以賣60、70萬一條。」但質素差的，「十幾蚊都有一條。」

Pearce擁有的錦鯉應屬「紅白」品種。李雅倫表示，眾多品種的錦鯉中，以「紅白」、「昭和」及「白寫」三個品種合稱為「御三家」，是較多人養及身價較高的品種，但並非所有錦鯉均價值不菲。以紅白品種的錦鯉為例，「佢嘅色澤要鮮明，例如白要純白，而『紅不可過鰭』，即係背鰭、側鰭、尾鰭唔可以有紅色或紅點，否則身價就會差好遠，係幾萬蚊同幾千蚊之比。仲有就係睇佢有冇證書，通常日本過嚟嘅都有證書證明佢嘅品種，以評賞魚嚟計，普普通通嘅都要十零廿萬一條，如果父母攞過獎嘅，分分鐘賣60、70萬都唔奇。當然啦，唔係條條都咁貴嘅，例如來自大陸嘅紅白，十幾蚊都有一條。」