莊思明同盧海鵬今日喺尖東出席「威迪斯號」啟航發佈會，鵬哥喺台上獻唱《激光中》同日文版《柔道龍虎榜》，及後司儀布偉傑問鵬哥嘅工作近況，鵬哥話：「冇撈電視啦，唔拍劇喇，容乜易拍拍下病，好似琴姐（李香琴）郁唔到。」（琴姐近況新聞連結： http://bit.ly/2slqaTg ）事後鵬哥表示有電視台確曾接觸佢，不過佢推咗，佢話：「本來都退休，但冇嘢做就唔係幾好嘅，唔做好快死。」問佢有冇探過琴姐？鵬哥表示：「好少，佢都唔係好認得人，阿炳（譚炳文）就有搵。」有冇叫炳哥都唔好咁辛苦？佢就話：「佢都好少拍劇，佢配音之嘛！」

至於莊思明指自己拍劇算好彩，拍攝時間唔算長，最長只係10幾個鐘。男友楊明經常做主角，驚唔驚佢辛苦？莊思明話：「唔驚，佢平時唔使返工都唔使點瞓，成日打機，慣咗喇！」莊思明透露8月會推出單曲，但7月會有個雜錦音樂會演出，問佢會唔會唱新歌？佢就話：「唔會，因為呢個音樂會係集體回憶，唱舊歌，我雖然係2000年代成長，但我鍾意聽80、90年代嘅歌，我偶像係鄭秀文同李蕙敏。」