壹傳媒創辦人黎智英次子黎耀恩被指勾結外國勢力，由黎耀恩開嘅茶記四季常餐，前日更被國安處人員大肆搜查。身為執業律師嘅前法政匯思召集人任建峰身先士卒，深入四季常餐，諗住探究呢間茶記點樣勾結外部勢力、分裂國家，可惜佢一個人勢孤力弱，未查到啲乜，所以佢呼籲大家幫手查吓。

任建峰經已喺佢嘅社交網站公開咗調查結果，佢發現四季常餐嘅定價算係唔錯，譬如喺中區可以用58蚊食碟頭飯、48蚊食常餐，仲要包嘢飲，佢覺得「未至於好吃到要大排長龍才能進食」，所以肯定係「有人做媒、虛張聲勢」。

更甚嘅係任建峰發現咗四季常餐嘅滑蛋叉燒飯所用嘅豉油，竟然係香口又唔鹹，「不是詐騙我們的讚賞還是甚麼？」至於個炒蛋又好滑，啲蛋有勾結外國牛奶之嫌。最離譜相信係個沙嗲牛肉麵，事關沙嗲醬喺近百年嚟被東南亞地區加辣、加甜「污染」咗，而四季常餐又要將沙嗲用喺中國宿敵嘅日本食物—即食麵之上，明顯係「在中國領土肆無忌憚地把即食麵做得那麼吸引」，「一定是為了收買人心、訓練漢奸。」

任建峰狠批四季常餐「惡毒勾結日本、危害國家安全，實在是居心叵測、令人髮指」之餘，亦慨嘆自己一個孤軍作戰，揭發唔到更多四季常餐嘅陰謀，所以希望大家一齊為國家出一分力，幫手去四季常餐調查調查。既然係為咗國家，咁無辦法啦。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：

iOS / Android