兩會議員田北俊牽頭搞「工商界關懷非典型肺炎受難者基金」，以佢嘅人脈，自然搵到好多大老闆幫手。八方收到料，同田少昆仲關係一向好好嘅新鴻基地產，好支持呢個基金，噚日以新地名義捐出一百萬。另外，南順集團噚日亦捐咗五十萬畀公益金嘅抗炎基金。
新地上次已經捐咗五十萬畀另一個救災基金，可以講話係今次疫潮最活躍嘅捐錢企業，八方希望佢哋起到帶頭作用，令基金累積更多錢去幫助有需要嘅人。
講開新地，佢哋早前請咗幾百個抗炎大使，除咗令更多年輕人有工做，亦真係幫到個場，唔係花瓶咁簡單。八方噚日有事去鷹君中心，就遇到呢群紅衣大使，佢哋幫你推門、㩒𨋢，又向途人派火酒棉；見到呢班後生仔友善主動，八方對個商場嘅管理大為改觀。
（圖）田少喺商界果然有號召力，佢牽頭搞嘅基金至今已經籌到超過二千萬。


傳真︰2623-9278
電郵︰[email protected]