【新增動新聞】
香港勁揪！年僅19歲嘅香港花劍一哥張家朗，周四喺保加利亞舉行嘅世界青少年劍擊錦標賽男子花劍個人賽決賽上演逆轉勝，以15:11擊敗日本選手齊藤進也，贏得個人兼香港歷來首個世青（青年組）劍擊冠軍！家朗賽後亦喺社交網站多謝大家支持：「終於把我的夢想實現了！多謝大家的支持！特別要感謝我們的總教練康教練（鄭兆康），喺佢帶領下，我可以全心去投入訓練，另外也要多謝花劍組的教練，是他們讓我不斷進步，同時也多謝香港隊各人的支持同打氣！也要多謝體院各部門的同事，最後我要多謝我嘅父母，是他們帶我走入運動世界，更讓我當全職運動員去追夢，今天對我來說只是一小步，未來還有更多的挑戰，後日還有男花團體賽，希望大家繼續支持香港隊！」

家朗賽後受訪時，亦有特別提到教練嘅一句話令自己放開嚟打，終於克服落後4:9劣勢後來居上：「其實由細到大都喺度諗呢個世青冠軍，到而家可以實現到其實好開心，同埋呢啲對我都係好大嘅肯定。其實都係教練嘅一句話，叫我放開啲去打，叫我攻佢，就放開啲去打。團體賽我覺得我哋都有機會，大家隊友都好好，希望團隊可以攞到冠軍。」

開心嘅當然唔知家朗，香港劍擊隊多位師兄師姐都喺社交網站睇住直播支持同送上祝福，好似大師兄張小倫表示「Congrats世界冠軍」，同樣係「花美男」嘅崔浩然就高呼Yesssss，輪椅劍擊世界冠軍余翠怡亦盛讚師弟嘅心理質素：「叻仔！終於可以企喺世青最高一級……其實打劍要鬥嘅除了技戰術外，心態才是最重要，放得開，才能手到拿來。恭喜你，世界冠軍。」