袁嘉敏、唐文龍、河國榮、張沛樂(沙律)同男友林耀聲噚晚到沙田出席《鐵血戰士:血獸進化》群星首映禮，沙律話男友林耀聲應自己要求一齊睇首映，平日兩人相處最主要是打機，阿聲指女友組了一隊女子電競隊，所以得閒就練習準備比賽，佢自己純粹為興趣打機，但若果同女友對戰，佢表示唔會手下留情，沙律話大家都係宅男宅女，平日生活平淡，拍拖主要是打機同睇戲。

早前沙律指未拍拖前，男友是自己IG粉絲，阿聲大方承認話:「有留意佢，因為我有同事同佢合作，睇過佢啲嘢都覺得幾吸引，跟住就靠個同事介紹認識。」追問阿聲有冇留意其他靚女IG，佢尷尬話：「唔係好記得啦，都成兩年幾前，不過個個都鍾意睇靚嘢㗎啦。」沙律笑指男友係漁翁撒網，阿聲反問女友不鍾意睇靚仔嗎？沙律話:「唔會喎，我好專一，你知㗎。」

本來已經喺大陸發展嘅袁嘉敏，近期回流接拍港產片，不過詳情仍未公布，只可以透露係演好黑暗邪惡角色，佢話：「開06通告，我就唔會瞓整殘自己，下個月生日，我都驚自己個樣補救唔番。」

袁嘉敏又話今次主要是劇情片為主，性感演出只有背部。完成呢部戲剛好到生日，問到會否出埠慶祝？佢話：「要睇下自己心理質素，之前去咗星加坡玩咗幾日，當自己一個人嘅時候就會諗起劇情，因為其他演員都做得好好，諗到人哋做得好時，自己會喊，都驚自己抽離唔到。」提議佢約男仔去旅行散心咪得，佢話:「都好想，仲係單身，中秋節都冇人約。」

精選娛聞，喺晒《娛果》
http://fb.com/appledailyent