這夜,我祈禱,「神啊!我知,我好毒,成30歲人都冇拍過拖。我有照鏡架!自問我唔醜,亦很溫柔,但點解偏偏冇男人肯Approach我?求你賜我荀盤。」
我一年365日都在等,等有一日神積會出現,不過,今天我特別覺得空虛、寂寞、同埋凍,所以我決定唱埋歌:「祈求天父做十分鐘好人,賜我他的吻,如憐憫罪人。我愛主,同時亦要一位愛人,祈求,沿途未變心,請給我護蔭。」
歌已唱,就當安慰一下自己的芳心寂寞。正當想大覺瞓之時,神奇的事發生了!眼前出現一道彩虹,令人感到絲絲暖意。叮一聲!竟然!真係出現個靚仔坐喺我面前,唔通神真係送個老公俾我。
「你係呀花呀嘛?」呢個男人把聲好溫柔,係,一個靚仔就算係講粗口,我都覺得佢係溫柔「係呀,你係…?」「我係天使,神話見你咁神心,所以派我來送禮,完成你心願!」「唔同你就係我命中注定…」「咪諗多,我只係Courier啫!你依家要做嘅嘢,就係答我一條問題!我有4個荀盤喺手,我用4間公司代表呢4個男人,你4揀1,就係咁!」
「點解唔可以直接開呢4個男人個名,要搵代號咁複雜?」「不要問,只要信,咁你要唔要呀?」「要!梗係要!」「好,呢4個男人代號分別係阿里巴巴、港鐵(066)、電視廣播(511)、亞視。」嘩!四間都係極品!咁真係要認真分析!
A:阿里巴巴
極度大男人,鍾意自己規矩自己訂。明明追緊你,但扮晒唔著緊,仲要成日講:「你唔理我我走架啦!」如果你都係唔理佢,佢就扮行開,但擰轉頭話:「我真係走架啦。」好聽就係吊高嚟賣,難聽就係屎忽鬼。
呢類男人肯定好煩,但由於有錢有樣,所以好多人明知同呢類人一齊,代價會好大,都會自動獻身。就好似阿里咁,訂價咁貴,但都有唔少人搶貨。睇《華爾街日報》,見到佢訪問一個髮型師,誇張到話仔女啲大學學費就靠阿里巴巴。一心諗住財力驚人,就做到長期飯票,以為安全感大。不過我唔會唔記得一個故事,就係阿里巴巴係要同四十大盜一齊的。
仲有,「阿里巴巴類」土豪,品味應該好差,你想收到份靚嘅禮物?諗下好啦。你睇下佢份上市紀念品,呢隻樣係恐怖版tvbuddy!(相關新聞: http://goo.gl/Qd778X)
B:港鐵
不切實際型,假大空!大家有眼見,港鐵今年上半年盈利79億,按年增28%,但一句話按機制加價,大家都冇Say。然後勁買國產貨,壞車、Delay樣樣齊,但仲要擴大版圖。
如果男人似港鐵咁就慘,自己本份都未做好,又要去做呢樣,做嗰樣,「我要去讀Master」、「我要搞生意」云云。車,做好自己份工,唔好成日遲到、早退、早錯事先講啦!
女人最忌男人度縮!明明賺好多錢,但又成日呻窮,仲要用埋啲Cheap嘢喺你身上,慳埋慳埋以自肥。咁都算,對小動物冇愛心直頭係死罪!呢類男人,不要得。
C:電視廣播
如果有類男人係「電視廣播型」,代表社會上影響力可能好高,但缺點兩個字講晒,小氣!
「我覺得你近來對我好差。」「好差?我唔使做嘢嘅?返工唔辛苦嘅?一係我咩都唔做,24小時陪你囉小姐!」你同佢以事論事,分析問題,佢就同你發難,一句唔鍾意就同你冷戰。
仲有就係看風使利,為利益,不分是非黑白,指鹿為馬,甚至不惜利用自己影響力,去做抹黑呢啲低莊野。人品唔好,點樣過世?再者,呢類咁自我中心嘅人,永遠唔會反思自己嘅問題,不思進取!覺得食住你,就唔會去令自己進步。呢類人冇希望的,搵過個好過。
D:亞視
膠都廢事派,完
「點呀!諗咗咁耐,揀定未?」「諗好!我決定…4個都唔要!要揀嘅,就要完全忠於自己!一世幸福,冇理由局限呢4個選擇。」「車!都運桔!阻住收工!」
by千頌
[email protected]堆填區
http://fb.com/winbigwok