中證監發佈《優先股試點管理辦法》，釋出放水善意，雖然對企業質量幫助不大，但證明阿爺到最後關頭，都會出手救市。受消息刺激，滬綜指輕而易舉重上2000關。A股積弱多時，難得有好消息出籠，斷估升勢唔會得一日貨仔，加上新經濟股累積龐大升幅，資金隨時會回流至低殘舊經濟股，令升勢火上加油。

揀A股概念股，除大路A股ETF外，識揀嘅一定揀內地券商股。本港上市三大內地券商股──中信証券（6030）、海通證券（6837）及銀河證券（6881），近半年拾級而下，走勢幾乎一致。用A股關聯度、beta值及累積跌幅篩選，信証明顯勝一籌，睇好A股要揀信証！先睇A股關聯度，去年至今，信証與A股關聯度為0.6（數值介乎1至-1，越接近1代表走勢越一致），海通亦為0.6，銀證最弱只得0.4。睇beta值，根據彭博資訊，信証達1.21，海通1.17，銀證未有數據，信証又勝一仗！講累積跌幅，信証由去年底高位累跌37%，海通則跌34%，銀證最差跌40%，信証有足夠反彈空間！又信証以投資銀行業務為主打，企業發優先股，信証受惠程度最大。
信証上周五反彈6.1%，收報15.36元，冠絕同業，並挑戰下降軌阻力，料可一舉而破，短線目標先睇18元！

唐牛