當年今日
關於我們

【李八方online】當年撐777做特首 何柱國暗批林鄭獨裁全港攬炒

蘋果日報 2019/09/01 19:28

林鄭月娥無綫TVB張曉明何柱國經民聯李八方ONLINE講清講楚逃犯條例緊急法

好多人都話,如果冇商界反對,俗稱「送中」惡法嘅《逃犯條例》修訂運動單靠民主派牽頭,唔會炒得熱。大家不妨睇睇3月之時,喺北京出席兩會嘅工商界政黨經民聯爭住向港澳辦主任張曉明告狀,迫到特首林鄭月娥最終「讓步」剔除9項商業罪類。當時星島新聞集團主席何柱國喺公開場合當住林鄭面對修例建議大肆鞭撻,甚至笑指有朋友驚返大陸被拉,不能「如沐春風」,成為政圈一時佳話。事隔近半年,北京落令「止暴制亂」,身為全國政協常委嘅何柱國都歸位,硬砌反修例示威者「奪權」,連林鄭班子都唔放過,痛斥佢哋「怕事、唔做嘢」。八方同大家回帶,2017年特首選舉,身為選委嘅「炒何」支持咗林鄭,理由係佢能力較為全面……
北京硬將反修例運動扯上有外國勢力,何柱國接受無綫電視節目《講清講楚》時當然同中央口徑一致,堅稱政府已經回應晒所有訴求啦,反指示威者而家嘅唔係旨在反修例,有人係想將事件變成「革命」,形容為反攻大陸、要習近平下台,對抗中國及推翻政權嘅「奪權行為」,指有外國勢力藉香港「打殘」中國,無證據下指「大台」一定存在,物資裝備「億億聲」,叫大家唔好中計。
噚日警隊在太子站點樣暴力,大家「有目共睹」,炒何就力撐警方執法冇問題,同時認定香港現行法律仍然能夠處理衝突,而家(記住只係講而家)毋須動用《緊急法》,重提政府提出修例初期已經提醒過林鄭「後果會好大」,只係對方唔聽,唔知係咪暗批林鄭自以為是,唔肯聽意見而令全港攬炒?但炒何冇同林鄭割席,堅稱依然支持林鄭,希望佢可以平息亂局,最重要統率官員,唔好畀官員變「廢柴」,直斥港府官員「怕事,唔做嘢」,如果唔係「縮頭縮腦」,根本冇需要實施《緊急法》,希望佢哋「唔好發夢」喎。
-----------------------------
【撐學生】
召集有心人 撐學生全年睇《蘋果》
立即按此