噚晚喺紅館舉行嘅跳繩錦標賽閉幕禮,張敬軒就去咗做唱歌嘉賓,不過佢只係唱咗一首歌,其實軒仔除咗唱歌,影相都有一手,好似之前佢幫胡杏兒影嘅泳裝相,就好靚喇。
軒仔喺訪問嘅時候,就俾人笑佢係唔係好鍾意幫人影相,係唔係成日影女仔,佢就話只係幫手,乜都會影,再問自己有冇泳照,佢就話:「杏兒就係香港之光,我就影響市容。不過都好開心,因為只係用電話影,平時都係鍾意揸大機。」咁泳裝相邊個幫軒仔影先,佢就話平時啲相係攝影師影,咁個攝影師係唔係叫關智斌呢?點知軒仔就話關智斌依家影相唔係好掂,因為唔係成日影。
講到軒仔有冇啲sexybody嘅相,佢就話:「Sexy點會同我有關,不過依家係特別小心,啱啱先知原來個電話開住,唔使講緊電話都會畀人竊聽。」咁軒仔平時傾電話講密偈係唔係要用地線,不過軒仔就話好少傾密偈,點知就俾人笑佢溝通不足,佢就話:「工作為主。」