外號「香港良心」嘅陳太新正頭去咗美國波士頓嘅TurfsUniversity，領取JeanMayorGlobalCitinzenshipAward，以表揚佢對香港事務嘅承擔同投入，以及努力不懈捍衞香港嘅言論自由、法治同民主。有獎攞，陳太當然四萬咁口，反正大學本來舊年就想頒呢個獎畀佢。呢個領袖獎以前南非大主教Tutu（杜圖）以及愛爾蘭前總統兼聯合國人權事務高級專員羅賓遜都攞過。

陳太返港收小報告

陳太攞呢個獎當之無愧，如果唔係佢見步行步，破天荒上街遊行反對政改方案，香港未必有咁多人睇到煲呔同肥龍嘅真面目。八方聽聞陳太在大學發表咗一篇題為"China'sFutureChallenges"（中國的未來挑戰）嘅演說，提及到香港對內地經濟嘅貢獻以及大陸貧富懸殊等問題。
當然陳太都有提到香港嘅民主進程，重再次話希望煲呔能落實《基本法》寫明會畀港人嘅普選啦。唔知煲呔係咪收到風知道陳太會喺美國講嘢，佢竟然第一時間喺香港開咪反駁，搞到陳太上周六一返港，就猛收小報告，聽講好㷫㖭。

煲呔係超級世界仔

又唔怪得陳太嬲，佢年初六喺美國演講，煲呔年初七就高調反擊，叫陳太唔好以舊思維同以前嘅處事態度去睇現時嘅政治需要同現實，又話迫佢都冇用。咁算點呢，即係卸晒膊啦，因為阿太一直覺得向中央爭取普選時間表係特首嘅責任，𠵱家煲呔話明做唔到，所以唔會做，你話七百萬人靠佢去同北京爭取，即係廢話啦。煲呔未講出口嘅，係其實佢最想陳太同陳主教同佢一樣識事務，做中央眼中嘅俊傑，隨風擺柳，放棄原則。
煲呔當日嘅肺腑之言，一時話自己太天真以為可以好易將中央同民主派拉埋；一時又話唔可以唔准人哋公開反對佢，真係愈講愈離譜。
呢啲嘢真係諗都唔應該諗，皆因拉近中港兩地關係同聽取不同意見係特首嘅天職，你成日計較得失，想走捷徑喺領導面前攞分，咪令人睇清楚煲呔超級香港世界仔嘅面目。
陳太顯然唔會因為煲呔咁講就收口，反而分分鐘會俾呢位舊同僚激到甚至迫到要挺身出嚟，為自己為香港人參加第三屆特首選舉。如果成真，呢個肯定係煲呔嘅功勞。

傳真︰2623-9278
電郵︰[email protected]