香港中學文憑試（DSE）結果塵埃落定，考生面臨升學就業的抉擇。就業輔導專家分析稱，市場上不少工作要求一定學歷、專門牌照或技能，中學畢業生搵工選擇較以往少，寄語求職者盡早認清興趣，「亦都唔好介意由低做起」；有人力資源顧問就提醒畢業生小心求職陷阱，切忌「帶錢打工」。

應屆DSE考生以99年出生為主。據學友社學生輔導中心副總幹事陳倩雯觀察，近年畢業生普遍解難能力較弱，「因為佢哋唔同以前中三、中五都篩人，所以面對困難或要選擇路向嘅機會少咗」，促畢業生調整心態，多向朋友、成年人取經，理解不同行業的前景及需求，再按興趣選擇合適的工作。

陳倩雯續指，現今不少行業均要求一定學歷或專門技能，DSE畢業生的求職選擇或不如大學畢業多，「例如保安，以前甚至可能係有熟人或有人介紹就可入行，依家就要考牌」。學校、政府機構有提供生涯規劃或職前課程，「只要你唔介意由低做起，仍然可以入行」，如從事工程可先做地盤、餐飲業可做侍應，「儲經驗，考返牌，最終都可以有好發展」。

安俊人力資源顧問董事總經理周綺萍則指，畢業生須小心求職陷阱，「如果叫你畀錢，例如啲咩培訓費、模特兒嘅出鏡費，通常都係唔正常」。部分銷售職位更牽涉倫敦金騙案，「可能係睇中咗你，要你自己或搵啲屋企人、朋友買；又例如佢請你個職位高出你學歷，又有唔錯嘅人工，就要小心」，也須留意職位是否「掛羊頭賣狗肉」，「叫就叫trainee（實習生），呃你入去，又係叫你賣嘢，同本來嘅工作需求不符」。

周亦有見工小貼士給予畢業生，包括準時、不要玩手機、提早預備身份證明、學歷副本、相片等文件，「面試時盡量試，例如叫你講幾句英文、普通話，就算唔擅長都應該試下，畀對方睇下你嘅態度，亦都唔好乜都唔準備，連見咩職位都唔知」，亦建議求職時衣著符合工作性質，「金融行業就多數要著套裝，除非係見設計、時裝等行業，否則紋身、染髮太前衛都唔太合適」；她提醒，簽約時亦須留意細節，包括法定有薪假期及離職通知期，「法例上至少要有7日大假，離職通知期就大家可以傾，但一定要係雙向，唔可以公司要求你一個月通知，但佢要你走就只係七日」。

記者 葉偉東