聖誕節就到嘞，社民連「長毛」梁國雄前晚凌晨返屋企時，發現有嘢喺佢門口吊吊揈，可惜唔係來自聖誕老人嘅禮物，而係律政司司長袁國強送上嘅「大禮」，但呢份禮卻被長毛直斥送得小家，點解呢？
長毛話前晚凌晨12點15分返屋企時，喺門口見到一封由律政司發出、以尼龍繩掛喺門口有關宣誓司法覆核案嘅法律文件。佢話覺得認真奇怪，認為政府竟然唔寄去佢立法會辦公室，而係寄去佢屋企？相信袁國強係質疑佢未依法宣誓、唔係議員，而有此騎呢「小學雞」舉動喎！

長毛質疑違程序

長毛話呀，袁國強呢下小動作，同財爺曾俊華前日喺立法會話唔承認部份議員資格，所以唔答議員問題係一脈相承。佢仲透露，其實上周五政府話要取消佢立法會議員資格後，已經試過用此騎呢方法寄嘢去佢屋企，只不過佢上次冇用手機影低，估唔到律政司食過翻尋味。
根據程序，律政司有責任確保文件交到被告手上，並確保被告已收到有關案件所需文件，長毛質疑，律政司今次用尼龍繩掛喺門口「當送咗」嘅做法係違反程序，因為封信可能會俾人誤以為係廢紙垃圾撿走，怒斥：「如果有人當廢紙執走佢，攞嚟賣點算？呢個廢柴政府，做嘢都係廢廢哋！」
同樣被政府入稟DQ嘅姚松炎亦透露，律政司都有將官司文件送去佢屋企，但亦有一份係送到佢嘅立法會辦事處。
八方問過律政司點解要用呢個方式派信，發言人話唔評論個別案件，而就法庭文件要送往邊處或以何種方式送達，首要考慮係適用法律同規則嘅要求，一般而言，有關法律同規則容許法庭文件以不同方式送達，包括以專人送達、掛號郵遞方式或放入信箱，強調呢次處理與一般情況無異，冇特別考慮。

李八方
mailto:[email protected]