當年今日

701收料站:大芬睇好德永佳

蘋果日報 2002/08/13 08:00


近排好多基金股都被洗倉,跌到一仆一碌,但德永佳(321)則有外資行出報告睇好,真係唔到你唔服。
德永佳股價早前由最高6.95元,一度插落最低4.175元,但好快就收復失地,上返5元水平。噚日有間歐資行出報告推介及調高評級,股價再升6.86%,收5.45元,好似同疲弱嘅大市毫無關係咁款。
經紀黃話,佢問過幾個芬佬,佢哋喺德永佳公布業績前後,曾經趁股價高企出咗唔少貨,不過隻股好似有個強大買盤支持,一路密密收貨,收尾佢哋先知道原來德永佳一直有個大芬揸咗超過10%,而且大芬繼續增持,呢個就係德永佳股價不倒之謎。
講開呢份外資行報告,原來德永佳除咗Baleno呢個牌子殺食之外,重搞多個二線牌子S&K,諗住喺大陸大展拳腳,兼且搵埋最近人氣最旺嘅F4做代言人。
慕容小初