城中「鑽石王老五」又少一位了！講緊嘅，係恒隆地產(101)34歲太子爺陳文博（Adriel）。佢爸爸陳啟宗舊年爆料，指阿仔有一位非常漂亮嘅女朋友後，之後一直冇乜聲氣。華華最近喺上海恒隆廣場翻新開幕Party見到Adriel，赫然見到Adriel左手無名指戴上戒指，再問陳啟宗是咪低調做咗新老爺，佢招積地爆出一句「做咗好耐喇」，跟住就揚長而去了。

咁啱得咁橋，陳啟宗又係舊年9月，喺旗下大連商場活動大爆阿仔已經拍拖，仲大讚個女仔「非常漂亮」，陳文博嘅媽媽都好鍾意咁話，估唔到事隔一年，佢已經做埋老爺，仲要做咗好耐㖭，恭喜晒。

華華喺上海恒隆廣場個Party，都好想借機會再八卦一下陳太嘅背景，可惜Adriel嗰日忙住招呼賓客。不過，Adriel似乎都係想收埋太太，盡量低調處理，舊年大家追問佢女朋友喺邊度識，佢已經扮撞聾反問「我識咗Ronnie(陳啟宗)幾耐？三十幾年喇」，鬼馬到呢!

只可以話，城中大孖沙富二、三代嘅筍盤真係買少見少，好似新世界(017)第三代大部份已婚，新地(016)幾位第三代亦已低調結婚，大家成日見到嘅郭基煇(Adam)又有女朋友，高大威猛嘅會德豐(020)接班人吳宗權唔知正式封盤未呢?

蘋果財經，關心你飯碗
http://fb.com/appledailyatm