名模Ana R.到灣仔出席腕錶品牌寶齊萊晚宴，同場還有陳瀅、雨僑、梁嘉琪、陳倩揚，王大業、葉蘊儀等，今年6月再做媽咪嘅Ana R.，對於好友Rosemary昨日榮升媽咪，兒下還跟Rosemary同日出生，Ana R.說：「我知呀，今朝4點仲同佢傾電話，佢話自己開心到難以形容，好似發夢咁，我當時揼緊奶同佢傾偈。」問到有冇同Rosemary分享？Ana R.話：「有呀，分享好多經驗，好似事前要預備乜嘢，仲教佢一啲細節嘅嘢。」

不過，Ana R.就未有時間去探BB：「應該好快出院，等佢返屋企先，睇咗相，佢眼大大好靚仔，但依家好難話似邊個。」至於Rosemary母子同日生日，Ana R.都戥好友開心：「係呀，好開心囉，知道佢今次係順產，唔係計劃定邊日出世，好幸運。」問到知唔知BB幾多磅？佢表示：「同我嗰個差唔多，3點幾kg，其實知道當時有颱風，又近佢預產期，道路危險都戥佢擔心。」

Ana R.話已經送咗禮物畀BB：「係自己親手造嘅尿片蛋糕，用三包尿片製成，下面係尿片，上面係嬰兒用品製成禮品，好得意。」講番自己產後狀態，Ana R.話：「每3、4個鐘就要泵奶，希望可以泵6個月，對自己好大挑戰，想出番嚟工作，但要取得平衡。」

精選娛聞，喺晒《娛果》
http://fb.com/appledailyent