呢幾日除咗特首嘅日子唔好過，重有一個人亦正經歷人生一大考驗，佢就係立法會議員陳智思。八方之前講過陳智思今個月飛咗去美國德州侯斯頓做血管手術，因為佢體內血管天生有啲問題，早年做咗移植手術換嘅血管最近塞咗九成，真係唔講得笑。早兩日佢做完手術，八方唔想打擾陳智思休養，只好第一時間搵佢嘅助理問候佢，點知Bernard（陳之洋名）好有心，即刻親自越洋覆Call。電話中嘅Bernard聲音有啲疲倦，不過佢話已經可以落床走動。

通波仔失敗
講到呢次手術真係驚險百出，先係入手術室前一個鐘，Bernard收到四、五個香港朋友傳來嘅SMS（電話短訊），爭相通知佢葉劉同阿松辭職嘅消息。入到手術室，醫生一開始先幫佢用通波仔方式通血管，點知失敗咗。
Bernard話過最危險嘅情況係要開刀換血管，好在醫生再試用另一種新科技，就係於血管內放置微型支架，將血管內壁重新撐起，卒之搞掂。
八方笑佢係咪聽到兩位高官辭職，所以影響接受手術嘅心情。點知Bernard話啱啱相反，原來佢一直擔心特首面對民怨唔知點收科，聽到葉、梁辭職消息，佢第一反應係舒咗口氣。



傳真︰2623-9278
電郵︰[email protected]