近期最熱嘅投資產品，莫過於人民幣債券，滙豐搶閘出台，噚日到東亞（中國）公佈，今日起發行至少10億人仔嘅債券，畀機構投資者同埋散戶。
原本東亞係全港第一間成功發行人債嘅外資行，但上星期四滙豐中國「突然」宣佈，發行10億人債畀機構投資者，搶閘飲咗頭啖湯，東亞主席兼行政總裁李國寶噚日喺記者會上，繼續佢一貫嘅幽默紳士作風，笑言要多謝獅子行幫忙。

滙豐搶發人債散戶冇份

寶哥哥揚言，對於獅子行搶先發人債「唔覺得唔抵」，仲話「幫到我哋（東亞）㖭，令人知道（滙豐人債）唔賣畀零售客，多謝滙豐幫手，以往（大家）好competitive（互相競爭），今次都唔知點解（幫手）」。
東亞（中國）副董事長陳棋昌亦不忘多謝一班傳媒日夜報道，今次東亞發人債係惠及老百姓，即係暗示獅子行未有顧及散戶需求啦。佢臨尾仲補多句，就算散戶去滙豐問人債都冇問題，因為滙豐呢期都係幫東亞賣人債咁話。
同場加映，寶哥哥個發債function，又點少得喺DowJones內幕交易一役中，同佢「出生入死」、人稱雄爺嘅梁啟雄。雄爺仲誠意到早過主人家到咁滯，未夠5點就現身。果真每次有寶哥哥，小雄同佢就有影皆雙。假如佢兩位各自年輕番50歲，個畫面相信一定會非常旖旎。

李華華
mailto:[email protected]