唐文龍今日一身運動打扮喺九龍塘出席單車慈善活動，為本地慈善團體「親切 Treats」籌款。佢係台上分享自己係美國每日都要踩單車返學，所以踩單車對佢來講係生活嘅一部份。

唐文龍受訪時話：「我兩歲半已經學識唔使用輔助轆嘅單車，去到外國生活嘅時候，每個小朋友都有單車。喺美國嘅時候，由於我讀書嘅校網唔係我住嗰區，所以每日最少都要來回兩粒鐘。」佢仲話因為自己學校嗰區鳥語花香，所以成日都會兜吓路。佢又話踩單車係一個人嘅生活：「可以吹下風、諗下野，自己嘅路程又係上山落山，所以特別鍾意嗰個速度感，對我來講都係一個鍛鍊。」

問佢o依家仲會唔會成日踩單車？唐文龍話：「返咗大陸做嘢到o依家返嚟香港，都比較少踩單車。香港地方好細，如果要大家踩單車返工返學都幾危險。」

日前佢同經理人遊銅鑼灣被《蘋果》影到(新聞連結： https://bit.ly/2GYTPqV )，唐文龍坦言覺得好好笑：「傳媒關心我嘅生活，我好多謝，但係真係唔係(拍拖) ，我哋識咗十幾年，佢係我嘅前經理人。」咁o依家係唔係唔夠膽同女仔出街？佢就話：「係啲女仔唔敢同我出去，o依家好似食齋咁樣，不過都係專心工作啦。原本4月有電影傾緊，不過都係傾唔成，覺得唔係太適合自己，最近都係做下活動同拍廣告。」

精選娛聞，喺晒《娛果》
http://fb.com/appledailyent