本田Monkey仔特別版｜高達、渣古版限量125部送模型T恤
蘋果日報 2020/12/12 00:03
本田Monkey泰國高達渣古特別版
元祖高達加紅渣古特別版本田Monkey，細細部，間屋大啲要嚟做裝飾都得。
「男人愛高達」這定論自從1979年日本開播第一套動畫後，來到現在超過40年依然沒改變。新類型人見到高達、渣古、聯邦、自護產品總會雙眼發光，茶飯不思想盡收家中，好像早幾個月泰國推出官方授權高達系列電單車頭盔，就大把香港電單車友想搶一個，而且更有炒價。今次就直程係電單車。
而且更加是近年越來越多人玩的電單車車仔代表本田（Honda）Monkey。不過和上次頭盔一樣，不像早年豐田（Toyota）推出的馬沙專用Auris，而是官方授權泰國製作的地區性產品。今次兩個特別版車款RX-78-2 Mobile Suit及MS-06S Char’s Zaku II，都是由泰國改裝單位H2C DESIGN製作，再經當地代理發售。不過每款只限量推出125部，所以一出已經賣完，今次未知香港會否有水貨返到？
說到本田Monkey仔，第一次推出是1964年，亦即是Z series minibike，50cc更加的骰。今次兩部限量車就是125cc版本，月頭亦在泰國Thailand Motor Expo 2020展出。車價129,900泰銖，即大約35,000港幣，跟車還會有特別版車匙、模型，更會有收納箱、T恤、藍牙喇叭。每部車亦會有獨立編號。
本田Monkey高達、渣古限量版的贈品份量也不少，不過三萬幾港幣只是泰國車價，仲要來港登記，未計香港稅。
至於車身特別之處，當然是拉花，高達版藍色車身，有藍色碳纖油缸殼，有高達圖案，亦有RX-78-2、地球聯邦軍Earth Federation Space Force徽章及字樣，再加碳纖包圍、藍色前叉、淺藍尾避震、紅色扭油筒等。
本田Monkey高達版本藍色車身為主。
傳說有三倍速的紅彗星馬沙專用渣古版，就紅色碳纖油缸殼，還有自護徽章及字樣，配紅色車架、前叉、避震彈弓、扭油筒等。
本田Monkey紅渣版本，其實沒有快三倍。
本田Monkey高達、渣古特別版車匙都好有型。
兩部本田Monkey高達、渣古特別版早前在泰國展出，不過火速賣完。
撰文：Michael
編輯：鄒仲安
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！