向太陳嵐近日相當留意娛樂圈大事，差不多件件娛圈大事都同佢有關，好似早前因為鬧爆周星馳引起熱議，然後又因為「鋒菲復合」，替舊愛將張栢芝喊冤，話佢喊爆數前夫霆鋒，當然亦引起網民一番熱話啦。

而早前無綫因為喺上個月27號，播出一段關於向華強嘅報道而道歉，內容係轉播台灣嘅娛樂新聞節目《哈新聞》，指傳聞喺某一個派對上面，向華強因不滿成龍和梅艷芳遲到要兩人罰跪，同場的曾志偉亦遭毆打，又影射向華強有某社團背景。

無綫道歉內容話「承認聯意未有就有關內容跟向華強求證，到節目播出後才有機會跟向氏伉儷及某些人士聯絡，悉上述之傳聞絕無其事，願為當事人造成的不快及聲名損害鄭重道歉。」亦藉住節目《東張西望》再次宣讀道歉聲明。

而今日凌晨向太先喺微博話:「TVBS哈新聞麥若愚除了深感致歉之外，也忠告網絡找資料很危險。丟了工作之外，節目也夭折。」到11點時再發一條:「這個節目所有台前幕後付出代價是關門了。哈新聞結束了。星期五。」消息仲快過傳媒，今日下午TVBS發言人葉毓君證實，《哈新聞》本周五確實是最後一集播出，之後該時段將規劃為資訊類節目，不過佢就澄清《哈新聞》停播純粹係功成身退，與向太事情無關。

但《哈新聞》2009年就開始播映，突然停播，實在耐人尋味。