恒隆地產早幾日趁市旺閃電批股集資67億，主要想加大內地嘅投資，主席陳啓宗（朗尼陳）噚日喺股東會後，再同大家講吓恒隆嘅「中國故事」，似乎希望接咗貨嘅國際基金經理覺得物超所值。
佢笑住形容，上海恒隆廣場同港匯廣場個項目𠵱家有成15%回報，簡直好似中Jackpot一樣，「恒隆喺其他城市發展，極有可能再中多次Jackpot」。皆因二線城市嘅地價較平，恒隆又識得捐窿捐罅搵靚地，除開嚟，長遠回報可能多過15%㖭。當然啦，頭幾年係投資高峯，佢預期回報頂多係4%至5%。

借錢容易批股難

言語間，朗尼陳講到自己成日同內地省市官員見面，似乎十分熟悉國情。佢亦有感而發：「以前做地產商，只做香港，搵地嘅時候，只係銅鑼灣、上環定尖沙嘴嘅考慮，𠵱家做內地房地產，就要有全國性嘅通盤考慮。」
朗尼陳話，恒隆喺內地嘅首階段發展計劃（92至06年）接近完成，主要講緊上海恒隆廣場同港匯廣場；未來10年係第二個發展階段，恒隆計劃喺8至10個城市發展12個項目；瀋陽係頭炮，有兩個項目，總投資105億，其中一個早排動工。其他城市包括天津、濟南、長沙同沿海城市，未來3至6個月可能有公布。
所謂三軍未動，糧草先行，難怪恒隆都要先批股籌旗。朗尼陳自己都話：「借錢隨時都借得，批股就要睇時機，最多以後需要時再借。」否則，若突然搵到好項目但係冇錢喎，咁就嘥咗啦。
[email protected]