喺03年拍電影《忘不了》入面嘅童星原島大地當年爆紅，唔經唔覺已經過咗十幾年，今年10月生埋日就20歲嘅原島大地，去年出席金像獎頒獎時，贏等唔少觀眾特別喺女士支持，大讚佢靚仔。

靚仔又真係大晒，話說仲喺日本讀書嘅原島大地，暑假嚟一嚟香港都有人搵佢拍戲。應《黃家欣》導演劉偉恆邀請拍新戲《日月星》，早前原島大地返港當日導演專誠搵埋戲中一班後生演員、包括拍過《點五步》嘅談善言一齊食飯、篤波。

而呢套戲早排終於開工，日前晚上9點左右，原島大地同邵美琪喺西環近山市街開工。故仔講述演富二代嘅原島大地去到搵女友湯怡，不過就被演湯怡母親嘅邵美琪阻止。戲入面演的士司機嘅邵美琪一直棟住拐杖，佢原本好深情咁叫大地仔唔好再搵湯怡，而大地仔一直唔肯答應，仲一怒之下就將個call機掉落地。睇返戲入面嘅道具同大地仔放喺Instagram嘅道具車，相信導演係想拍返90年代嘅情懷。

講返當日拍攝嘅天氣頗熱，邵美琪同大地仔都要着住冬天外套，所以導演一叫「cut」就有人畀把手提風扇原島大地，仲有人幫佢印汗同畀水佢飲。反而拍攝經驗豐富嘅邵美琪好頂得熱。雖然一個簡單鏡頭，但係導演前前後後不同鏡位都要指，雖然兩個人好多shot都一take過，但依然拍足一粒鐘至收工。