多位銀行高層噚日排排坐喺立法會，咁偉大嘅場面肯定空前，是否絕後就未知。賓架位高權重，當眾俾議員公審，心情如何，睇吓佢哋木無表情反應就知，學似前財爺阿松話齋，今次真係有咁耐風流，有咁耐……
講番現場情況，中銀香港總裁和廣北噚日都有現身接受議員質詢，其他賓架大部份時間粒聲唔出，和總係銀行公會主席，避無可避要接招。不過佢反應有啲奇怪，成日都好似唔知議員講乜咁，後來先知原來立法會有廣東話、英文即時傳譯，卻冇普通話即時傳譯服務，議員機關槍式質問，和總聽到一頭霧水，聽得明就答，唔明嘅就惟有收口講少句。內會主席劉健儀了解後，表示有提供普通話即時傳譯，可能係技術問題，待慢和總唔好意思。