29歲英國靈魂歌姬Adele聲靚又有愛心，之前俾人影到於倫敦火災現場低調慰問傷者，之後亦繼續佢嘅個人世界巡迴演唱會，估唔到突然傳嚟佢唔再做巡迴演唱會嘅消息！近日佢喺英國溫布萊球場舉行最後幾場演唱會，但後台歌單之中夾住一封手寫信，寫到「演唱會已經好難有驚喜同歡樂，今次巡演只係為咗你們而舉行」，令歌迷非常驚訝。

信入面寫到：「經過咗15個月嚟嘅巡迴演出，同埋唱片《25》18個月嚟嘅宣傳活動，我哋終於嚟到終點。今次巡演去過英國、愛爾蘭，整個歐洲、美洲，仲去咗澳洲同紐西蘭。巡演係好特別嘅事，唔太適合我，我係一個真正嘅宅女，小小事就可以令我好開心。我份人好戲劇化，我之前一直做得唔好，直到而家都係！」講到自己唔鍾意巡演，想唔再做。

佢又寫：「演唱會已經好難有驚喜同歡樂，今次巡演只係為咗你們而舉行，希望可以對你哋嘅生活做成影響，就好似我所喜愛嘅藝術家對我嘅影響一樣。因為我唔知係咪仲會再開巡演，所以希望將最後一次獻給自己嘅家鄉。」信件嘅最後佢簽上自己個名，並表示自己餘生都會記住呢一切。呢封信確實震驚樂迷，令大家都好唔開心，紛紛留言希望佢回心轉意。