恒隆地產（101）董事長陳啟宗（Ronnie），噚日出席香港外國記者會（FCC）午餐會時妙問妙答，再次用內地女星范冰冰，形容自己喺內地嘅商場幾巴閉。今次加埋荷李活型男畢彼特（Brad Pitt）做例子，可能擔心一班外國記者唔識范冰冰係邊位。
被問到點睇中國商場前景時，Ronnie又再形容旗下商場好似范冰冰，「唔怕冇男朋友（租戶）」；佢可能擔心現場外國記者唔知范冰冰係乜水，今次仲用埋畢彼特做例子，「其他商場好似我咁醜樣，但恒隆嘅場同畢彼特一樣咁正，唔愁冇女朋友」。

坦言特首人選　北京有想法

翻查資料，自2012年起，陳啟宗多次拋出「冰冰論」去講旗下商場，可見佢對呢位女神幾咁情有獨鍾。佢又知唔知范冰冰已經有李晨做男朋友呢。
出名寸嘴嘅陳啟宗對金融界亦唔留口，有記者問到，中國經濟增長放緩，投資銀行擔心人民幣貶值影響經濟，佢就答「我從來唔信兩種人，一係投資銀行家，二係記者，但你哋（記者）有樣好，起碼比較誠實」。
講到誠實，陳啟宗對國家真係好誠實。舊年底，佢喺恒隆年報「董事長致股東函」中，形容內地市道低迷，仲質疑「一帶一路」成效。
咁啱就得咁蹺，CY最新一份施政報告猛提一帶一路，陳啟宗噚日解話唔係睇淡一帶一路，只係認為中國經濟需要短期刺激，而一帶一路屬長遠政策。咁支唔支持CY連任？佢笑笑口話北京早有想法，「唔使問阿貴喇」。

李華華
mailto:[email protected]