音樂巨匠黎小田本月1日不敵病魔離世，其生前一班好友將為他舉行紀念音樂會，今日在尖沙嘴記者會上，薛家燕透露「To 小田 : With Love Forever 音樂會」將於明年1月10日假旺角麥花臣場館舉行，門票明天公開發售，收入扣除相關開支，將會全數撥捐「K for KIDS FOUNDATION」用作支持及培育弱勢社群的小朋友學習音樂用途。

家燕姐指黎小田栽培好多新人成為巨星，貢獻很大，所以12個單位在上星期開始籌備這個紀念騷，很多歌手一呼百應，包括家燕姐、陳欣健、李龍基、麥潔文、徐小明、柳影虹、冰兒、杜德偉、林德信、黎瑞恩、布志倫、雷安娜等，葉振棠、草蜢、胡渭康、林利、陳秀雯、梁漢文、蘇永康、鄭丹瑞，張德蘭就度期中。

問到家燕姐於當晚唱甚麼歌？她說：「《心肝寶貝》，上次錄節目嘅時候，我唱到一半就唱唔到，我希望今次能夠完整唱晒成首歌，仲有喺《家燕與小田》特輯，我哋一齊演過《胭脂扣》，希望透過何麗全可以攞番呢條片嚟播。」她透露黎小田家人將現身當晚的紀念音樂會，但未知會否上台。

對於黎小田設靈當晚，有位署名張國榮的花圈在堂上，家燕姐說：「我諗應該係張國榮嘅家人，有件事好特別，靈堂上有隻黑白色蝴蝶，外形好似keyboard，伏喺凳背，睇晒成個堂，大家埋去影相，佢都冇郁，直到第二日都仲喺度。跟住儀式開始，佢就飛去遺照下面啲花度，通常會有飛蛾出現，但嗰日係一隻好靚蝴蝶。」問她有否夢見過黎小田？家燕姐表示：「有，喺夢境見到佢，都係同佢唱歌，做趣劇，我哋笑到唔停到口，可能我日頭睇番片段，夜晚發夢就見到佢，但都係開心樣，我當然唔捨得佢，我代表佢多謝音樂界咁多朋友嘅支持，希望佢在天之靈都感覺到，佢嘅貢獻係冇白費，大家都好懷念佢。」提到會否邀請黎小田前妻關菊英演出？音樂會監製錢國偉說：「菊姐嗰陣時唔喺香港。」家燕姐坦言沒有聯絡過關菊英。

採訪：黃曉妍
攝影：仇志德

-----------------------------
《2019高級珠寶鑑賞誌》
點擊即睇過百款鑽飾名錶
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇