喺乜都有得賭嘅英國，連聖誕節有冇雪落都可以賭，C朗想離開皇家馬德里咁大單嘢，當然有得賭；英國博彩公司立博已經開咗C朗下一站賠率，曼聯眾望所歸係大熱，只得2.75倍，連中超、美職都有開盤。

或者曼聯7號呢個印象太深入民心，所以唔少人都主觀願望C朗會回巢，莊家都順理成章將曼聯列為大熱。法甲亞軍巴黎聖日耳門，一來錢好多，二來同C朗一樣係一剔贊助，所以就5倍次熱，任何一支中超就7倍，曼城就11倍，任何一支美職球隊就13倍。咦，雲格講過如果皇馬標價8千萬鎊就會提出收購C朗，但莊家竟然完全無視阿仙奴，真係當雲格冇到。