第23屆華鼎獎今日喺澳門舉行，之前《戰狼II》切合中國主旋律，喺頒獎禮前已經先拔頭籌，得到「中國電影滿意度調查」嘅第一名，「最佳男配角」亦由《戰狼II》嘅吳剛得到。

《戰狼II》喺呢個頒獎成績好好，提名暫時都未有落空，「中國最佳導演」亦都落入吳京手入面，而頒獎嘉賓係……香港嘅視帝黎耀祥。上星期二係吳京生日，大會亦都為佢送上一個生日蛋糕。吳京亦憑《戰狼II》拎埋「中國最佳男主角」，但《戰狼II》最終輸咗俾由文晏執導嘅《嘉年華》，失落「中國最佳影片」，提名未能全中。

另外林心如就憑《嫌疑人X的獻身》奪得「中國最佳女主角」，李晨就憑《空天獵》贏到「中國最佳新銳導演」。中國電影終身成就獎就由秦沛獲得。

第23屆華鼎獎得獎名單：
中國電影滿意度調查第一名：《戰狼II》
中國最佳影片：《嘉年華》
中國最佳導演：吳京《戰狼II》
中國最佳男主角：吳京《戰狼II》
中國最佳女主角：林心如《嫌疑人X的獻身》
中國最佳男配角：吳剛《戰狼II》
中國最佳女配角：張榕容《妖鈴鈴》
中國電影最佳編劇獎：彭浩翔《春嬌救志明》
中國最佳新銳導演：李晨《空天獵》
中國電影最佳新銳演員：鍾楚曦《芳華》
中國電影年度最具潛質演員：衛詩雅
中國電影年度突破演員獎：娜扎
中國最佳電影歌曲：于文文《體面》
中國電影最佳紀錄片獎：《二十二》
中國最佳製作機構：華誼兄弟傳媒股份有限公司
中國最佳製作人：關海龍、張苗
中國電影終身成就獎：秦沛