由社會民主連線、人民力量、香港眾志、工黨、文化監暴、民主黨、新民主同盟等，今日發起「罷買全線L'Oréal產品」，過百人參加活動（新聞連結： http://bit.ly/25LkpgD ），場面墟冚。有唔少人唔可以親身去現場，但都喺社交平台幫口踩一腳，不過就……有時都真係睇清楚先好po文。

好似公民黨立會議員毛孟靜今朝，就喺fb引述專欄作者麥志豪（MarkMak）講化妝品要進入中國巿場，產品經過動物測試係入門要求，再講到話人哋連啲小動物嘅生命都可以放棄，所以唔會爭在一個何韻詩云云。

有文最好有圖，毛孟靜仲貼咗張圖，相中見到有一班貓，全部肚腩朝天，手腳被固定喺金屬板上，然後有幾個戴晒頭套嘅工作人員準備「招呼」班貓貓，似乎係想表達啲貓貓準備俾人拎去做測試。

不過，睇真啲張相，有啲熟口面……其實張相已經喺網上瘋傳咗幾日，亦已經有人澄清咗相中嘅貓貓，係準備做絕育手術，並唔係俾人拎去做測試嘅。幸好毛姨姨好快就delete咗張相，文就喺番度。