記者協會創新猷，本月起每月邀請政商紅人出席午餐會同行家近距離接觸，政務司司長唐英年為記協獻出第一次。早前佢到中大領榮譽學位時被柴台，可能猶有餘悸，噚日要求出席記者自報讀邊間大學，等佢數數有幾多中大畢業生，結果半場人舉手。雖然中大幫人多勢眾，但唐公子強作鎮定，話相信冇人會喺枱底彈出嚟示威。
雖然無人反枱，唔代表唐公子安全，中大畢業生、記協新任總幹事莊曉陽問唐公子，明年補選，佢會否鼓勵市民投票，谷高投票率？呼籲市民行使公民權利投票高官有責，但卻變相動員市民「公投」，因此呢個問題頗刁鑽，唐公子無奈hea答，「每位市民都應該行使佢哋公民責任。」司長咁講，大家識做啦。