皇家飯究竟係乜嘢滋味？八方終於有機會嚐到喇。
大吉利是！八方唔係惹官非，只係懲教署長噚日招待傳媒參觀赤柱監獄，其間帶我哋睇供應囚犯膳食嘅廚房。大家都知，赤柱好多知名囚犯，例如新地案「四子」許仕仁、郭炳江、陳鉅源同關雄生；仲有陳振聰、葉繼歡等。監獄嘅膳食唔錯，餐單經衞生署營養師睇過，囚犯仲可按國籍宗教或健康理由，申請改食西餐、印度餐、素食等。八方同其他行家即場試食囚犯嘅晚飯餸菜，原來肥龍、郭炳江同其他囚犯噚晚食雞翼，味道算係咁。

獨囚負責黐信封

八方聽聞，四子初時喺獄中唔係好慣。怕凍嘅肥龍冬天冚8張氈都覺冷，獄中醫生認為佢體溫有啲低，一度安排佢住院。炳江入獄初時有冇剪髮曾引起關注，原來佢出示咗大學專家嘅證明，因耳道缺陷要戴助聽器，兩邊頭髮冚住可作保護防風聲之類干擾。獄方當時好謹慎，要搵政府醫生核證，但又碰上長假，結果炳江頭幾日唔剪髮住，後來經政府醫生睇過，同意畀佢保留兩邊頭髮，但後尾枕一樣要剪。四子喺獄中負責黐信封，有獨立囚室，經過幾個月似乎適應好咗。
警察入職體能測試將取消引體上升等項目，但懲教署就暫無計劃放寬體能要求。因應過去6年有5宗囚犯押送到監獄外睇醫生時逃跑個案，高層更考慮加強裝備，例如佩槍。
原來近年獄中多咗唔少嚟自非洲嘅囚犯，亦有幾百個在囚人士係回教徒。獄方當然要尊重囚犯信仰，例如見到可蘭經唔好亂掂。八方問啲阿sir，IS入侵香港之說甚囂塵上，佢哋話當然會監察住。八方仲喺監獄醫院見到老保安施伯，得到獄中醫生治療，佢精神尚可。

李八方
mailto:[email protected]