達明一派嘅3月紅館騷,因黃耀明曾撐雨傘運動,令演唱會P頭海報被下架,事關海報上出現嘅某位藝人,擔心被誤會撐明哥撐黃絲,會影響佢喺內地市場嘅金飯碗。海報上嫌疑藝人包括:曾志偉、周杰倫、周星馳、陳奕迅、黎明、劉德華、鄭秀文、梁朝偉,馮仁昭收到消息,有傳呢隻無形之手,就係台灣天王周杰倫。
對此,達明演唱會主辦商環球唱片CEO黃劍濤喺電話回覆:「我唔會答係邊個,因為應承咗人,就算問係咪A、B、C都唔會答,我唔想俾人亂估亂砌,出面講咗好多個,我都唔會答,唔會否認。」問到達明騷請唔請到嘉賓?佢話:「好似度緊,我覺得音樂就音樂,唔好扯埋政治講。」