台灣藝人楊丞琳日前推出主打《單》，呢首歌被封為「催淚神曲」，希望讓所有單身嘅人面對「單身」，希望聽眾可以將心底最深嘅痛釋放出嚟！

楊丞琳首次做MV導演，兼打友情牌搵好友「阿Sa」蔡卓妍做MV女主角，二人默契十足，當阿Sa演完崩潰喊爆呢一幕，楊丞琳覺得心疼，冇理仲roll緊機就直接入鏡，安慰喊緊嘅阿Sa，送上「愛的抱抱」，之後兩女大方上演錫錫，大晒友情，令人聯想起丞琳曾主演過女同志經典電影《刺青》，現場工作人員笑稱：「我們現在是在拍《刺青2》嗎？」

阿Sa喺《單》MV演一個單身女日常生活，由洗衫、跑步、購物到夜晚為朋友搞生日派對，一切可以獨立完成，但當夜深面對鏡中卸妝後，阿Sa唔再笑面迎人，即崩潰喊爆，因為再開心嘅人有一日會受唔住孤單而難過掉淚。

楊丞琳之所以想要搵阿Sa主演，係因為阿Sa好符合呢首歌嘅狀態，而且阿Sa演戲經驗豐富、表演自然，楊丞琳同阿Sa緣分始於16年前，當時楊丞琳16歲，阿Sa就18歲，阿Sa後嚟接咗另一部片，錯失咗機會。今次阿Sa一聽到楊丞琳做導演，阿Sa主動稱唔收酬勞。

對於MV女主角阿Sa，楊丞琳都好照顧，一有機會仲食阿Sa豆腐，楊丞琳笑言：「我的演員累了，我在幫她捏穴位啊！我可是被認證過的『按摩王』。」點知痛到阿Sa拼命求饒，楊丞琳亦好感激：「阿Sa的表演真情流露，她真的很棒！我非常感謝她，也希望大家可以看到不一樣的她。」