羅蘭今日同埋黃榕、仙樂都一齊去到石籬邨出席長者聚餐活動，啱啱去完台灣同歐陽震華拍旅遊節目嘅羅蘭姐話，腸胃有少少唔舒服：「食滯咗，應該係去台灣時食得太多。」羅蘭姐話今次台灣環島用咗18日，走勻晒台北、台中同花蓮等地。既然唔舒服做咩唔留喺屋企休息吓呀？羅蘭姐話：「一早應承咗，何況我都冇咩事，好少問題啫。」呢啲咪叫做專業囉！

而黃榕被問到有無留意舊愛張致恒（Steven）近日同莊端兒分手嘅報道？佢話：「有睇過，不過同佢已經好耐之前嘅事，唔出奇呀，男仔都係鍾意喺出面識女仔㗎啦！」在旁嘅仙樂都就話：「唔係個個男仔都係咁，係你唔好彩啫。」

黃榕又話，當年同Steven拍拖時已經感覺到佢出面識咗其他女仔，所以就同佢分開，之後亦冇聯絡。但係Steven話到懷疑自己性上癮希望尋求醫生幫助，黃榕話：「咁如果有問題去搵醫生都係好事，希望幫到佢啦。」