大難不死，必有後福，經歷金融海嘯，恒指上半年升近三成，基金經理要嚟個半年結，華華亦為經常為散戶指點迷津嘅大孖沙，嚟個半年結，睇睇佢哋旗下間寶號股份升幅，結果大家都跑贏恒指──除咗超人李嘉誠。
今年2月，財經雜誌《福布斯》公佈09年香港富豪榜，指超人身家冇咗一半有多，得番1264億銀。不過，視富貴如浮雲嘅超人，亦喺2月長實低位時增持該股，結果長實上半年升超過兩成，佢手頭嘅持股，市值亦升到831億銀。不過，相比其他三位大孖沙，超人嘅成績最差，跑輸大市，有啲失威喎。

何鴻燊最標青

最標青係牙擦擦嘅賭王何鴻燊，單係佢間信德半年已升咗129%。賭王分別喺6月同7月出手增持信德同澳博，掃貨前曾預言股市有機會升到三萬二，睇嚟佢要用行動話畀大家知自己surewin。
至於被喻為「香港股神」嘅四叔李兆基，雖然旗下恒地升55%，但就唔及老友彤叔間新世界發展，升78%咁好成績。點都好，四叔揸住恒地嘅股份，市值514億銀，比去年底市值升咗182億銀。四叔1月時密密增持恒地11次，當時恒指喺萬三關口上落，4月時恒指近萬五點徘徊，佢再增持8次。
四叔喺5月仲將策略公諸同好，話如果銀行嘅情況好啲，恒指喺萬三、萬四點時可以入市，到銀行好得七、八成，恒指見萬四、萬五點時可再入。佢仲提醒大家，睇好恒指可升到2萬點或以上，到時記得減持，轉買商品。

李華華
mailto:[email protected]