慧妍雅集一眾成員今晚集齊洲際酒店舉行慈善晚宴，朱玲玲、陳法蓉、楊思琦、陸詩韻、馬賽、向海嵐等均悉心打扮示人。陳茵媺身材向來驕人，但今晚佢件晚裝就剛好遮住咗條事業線，只係見到「個shape」；至於馬賽則以性感全白「純純兔」形象現身。

綜觀全場，陳法蓉就最為性感，記者稱讚佢時，陳法蓉好surprise咁話:「係咩？靚就得，我又唔覺得自己特別sexy。」晚裝由何國鉦幫佢悉心打造，非常豐滿，陳法蓉好開心咁話:「多謝！」仲話今年留香港耐啲，幫慧妍手，六月就幫自己套內地劇做宣傳。現場因為太多人，爭妍鬥麗，故此影大合照都搞咗好耐。至於同屬港姐出身嘅何傲兒，噚晚已透過大會表示今日不會出席。

朱玲玲受訪時就話，佢今日一大朝早八點已開始為今晚晚宴打點及綵排。問佢是否日日見粒孫？佢話:「唔係日日見，我都忙，見到都好開心。」粒孫係咪開始要揀學校呢？朱玲玲謂:「交俾父母處理啦，佢哋都要盡責自己搞。我都經過呢個階段，如果佢哋問意見的話，我都會俾意見。」

朱玲玲又話:「佢哋依家湊B應該叻過我當年。(想抱多個孫嗎？)呢個我冇出聲，等佢哋自己決定。(想抱孫女？)想，但冇同佢哋講。」咁係咪越多孫越好呢？佢話:「唔一定，父母壓力都好大。(有冇分享經驗？)講番佢哋細個嘅情況俾佢聽，其實三個仔當時都易湊，對我嚟講唔係好大挑戰。」佢又話粒孫依家八個半月大，唔笑嗰陣就似啟剛，笑起上嚟就似晶晶喎。