中通社噚日先後喺下午4點09分同4點19分發出兩篇有關泰國示威嘅報道,八方諗住睇吓有咩堅料,點知睇落熟口熟面,好似喺邊度見過,跟住拎番噚日份《蘋果》出嚟睇睇,發現成條新聞同《蘋果》嘅報道幾乎一模一樣。
好似4點09分發出嗰篇稿,除咗頭三段夾埋唔夠200字嘅內容之外,其餘900幾字除咗改一改個日子,基本上都抄足《蘋果》。好似一啲描述句,例如寫泰國總理阿披實想借東盟峯會,展示政局回復平靜,「但在二千名支持前總理他信的紅衫示威者大鬧會場後,碰個焦頭爛額」,遣詞用字完全一模一樣。
抄襲唔值得鼓勵,但八方阿Q啲諗,《蘋果》被半官方喉舌抄襲,證明《蘋果》新聞有公信力。唔知《蘋果》有關平反六四同爭取普選嘅報道,中央係咪都睇得到?